Bai herritar taldeak eta bai erakunde publiko batzuk etxeen espazioa beste era batean planteatzea proposatzen duten proiektuak lantzen ari dira. Sustatzen ari diren etxe ereduan, garrantzia ematen diote komunitateari eta kolektiboari bai alderdi sozialetik eta bizikidetzarenetik, bai diseinuaren, espazioen banaketaren eta arkitekturaren aldetik eta bai jabetzaren eta antolatzeko eraren aldetik. Era berean, proiektu hauen xedea da ohiko etxebizitzaren alternatiba berritzaile bat sustatzea, eta politika publikoetan eragitea, bai etxebizitza arlokoetan, eta bai asistentzia arlokoetan.

Elkarrekin Bizi proiektuaren helburu orokorrak dira etxearen eredu kolaboratibo batean sakontzea, dauden aukerak analizatzea eta gure ingurunera egokitzea, horretarako tresna espezifikoak sortuz.

Honako helburu hauek planteatzen ditugu:

• Etxe kolaboratiboaren eredua zehazteko prozesu bat garatzea.
• Etxe eredu bat garatzea non protagonistak auzokideak izango diren.
• Belaunaldien arteko harremanak sustatuko dituen prozesu eta espazio bat sorraraztea.
• Erakunde publikoak, enpresa espezializatuak eta komunitateko eragileak elkarrekin lan egitea.
• Eredua hedatzen lagunduko duten baliabideak sorraraztea.

Zehazki, eta askotariko sektoreetako profesionalekin lan eginez, irtenbideak bilatzen saiatu gara honako alor hauetan:

• Juridiko-urbanistikoa
• Arkitektonikoa
• Zaintzak eta komunitatea
• Bideragarritasun ekonomikoa eta finantzarioa

Prozesu honetatik atera diren emaitzekin, asmoa da horiek oinarri gisa hartzea etorkizuneko belaunaldiarteko etxe kolaboratiboak gauzatzeko, baina jakin badakigu hori garatzeko zenbait alderdi zorroztu behar izango direla, baita proiektua abian jartzearen ondoriozko aldaketetan ere.

Horrez gain, asmoa da emaitza horiek baliagarriak izatea etxe kolaboratiboen eta/edo belaunaldiartekoen ekimen berriak martxan jartzeko.